Viti 2012 është viti që për të gjithë shqiptarët shënon 100 vjetorin e pavarësimit, 100 vjetorin e formimit të shtetit modern shqiptar, 100 vjetorin e rikthimit të shqiptarëve në Evropën moderne, 100 vjetorin e marrjes në dorë nga vetë shqiptarët të fatit të kombit dhe të shtetit shqiptar. 100 vjetori është një festë e madhe për të gjithë shqiptarët.

 

Ajo duhet të mbetet e tillë edhe në mënyrën se si ne të gjithë e kujtojmë, e përjetojmë, e festojmë dhe e gëzojmë atë, të gjithë së bashku, pavarësisht ku ndodhemi, në Shqipëri, në Kosovë, në Maqedoni, në Malin e Zi, në Danimarkë, në Skandinavi apo në cdo vend tjetër.

 

Ambasada e Shqipërisë në Kopenhagen e hapi siparin e festimeve të 100 vjetorit me një përfaqësim dinjitoz në panairin e turizmit në Bella Center më datat 22-23 janar 2012.Ky është vetëm fillimi i një viti të mbushur me aktivitete.Ne dëshirojmë që të gjithë shqiptarët që jetojnë në Danimarkë dhe miqtë e tyre danezë të marrin pjesë në festimet e 100 vjetorit të Pavarësisë.

 

Kam kënaqësinë e madhe të ftoj të gjithë bashkëatdhetarët, të gjitha shoqatat dhe grupimet e shqiptarëve, mediat e ndryshme që të bëhen pjesë e këtyre festimeve. 

 

Janë të ftuar të gjithë miqtë danezë dhe dashamirësit e Shqipërisë e të shqiptarëve t’I bashkohen festës sonë.

 

Ne ju ftojmë të gjithëve të sillni idetë, propozimet dhe mundësitë tuaja për të shtuar numrin dhe fushën e aktiviteteve që mund dhe duhet të organizojmë në festimin e ditës së shenjtë të kombit shqiptar: 28 nentorit 1912!

 

Ju mirëpresim,

 

Arben Cici 

Ambasador i Shqipërisë në Danimarkë